mai201816

Antananarivo, 16 mai (ANTA) : Manoloana ny toe-draharaha misy, ankehitriny, eto amin’ny Firenentsika, dia manao izao fanambarana iombonana izao izahay Parlemantera (Senatera sy Solombavambahoaka).

Mandalo tsy fitovian-kevitra mahery vaika ny tontolo politika Malagasy amin’izao ankatoky ny fifidianana izao, izay niainga tamin’ireo adihevitra mafana mahakasika ireo lalam-pifidianana, izay nitarina ho fanakorontanana tanteraka ny fiainam-pirenena,

Noho izany :

- Miantso ny rehetra hitandro toy ny anakandriamaso ny lalam-panorenana sy ny sata repoblikanina ;

- Manantitrantitra fa ny fifidianana ihany no lala-tokana miantoka ny fitoniana eto amin’ny Firenena ;

- Mamporisika ny fifampiresahana eo amin’ireo mpisehatra rehetra, na sivily na miaramila, izay tandrify izany, ho fikatsaham-bahaolana ;

- Mitaky ny fanajana tanteraka ny fisaraham-pahefana (séparation de pouvoirs), ka aoka hajanona ny teritery sy ny ramatahora amin’ireo andrim-panjakana sy ireo rafitra misy : HCC, CENI,… ;

- Manohitra amin’ny herinay rehetra ny fikasana hampikatsoana ny fampandehanan-draharaham-panjakana, izay miantraika mivantana amin’ny fiainam-bahoaka ;

- Mampahatsiahy fa ny rafitra nivoaka ny lalam-panorenana (extra-constitutionnel) izay natsangana taorian’ny fanonganam-panjakana nifandimby, dia niteraka voka-dratsy hatrany sy tsy fahombiazana teto amin’ny Firenena, ary nahatonga fahantrana lalina izay zogaintsika vahoaka Malagasy hatramin’izao ;

- Tsy manaiky ny fikasana hampiantoana ny Filohampirenena, voafidim-bahoaka, amin’ny asany, amin’izao volana vitsy alohan’ny hahataperan’ny fotoam-piasany izao ;

- Mitsipaka marindrano ny teti-dratsy mikendry ny hametrahana « TETEZAMITA VAOVAO », izay efa nanapotika ny fiainam-bahoaka ;

Eto ampamaranana dia manao antso avo amin’ny olompirenena rehetra ho tony sy hitandro hatrany ny soatoavina maha-malagasy, ary misaotra sy mankahery antsika hatrany.

Ho an’ny fitiavan-tanindrazana.

Natao teto Antananarivo, anio faha 16 may 2018

Laisser un commentaire